មន្ត្រី ក្រសួងមហាផ្ទៃ ស្នើឱ្យមន្ដ្រីនគរបាលគ្រប់ប៉ុស្ដិ៍ប្រមូលអត្តសញ្ញាណប័ណ្ណប្រជាពលរដ្ឋ ពីគ្រឹះស្ថានមីក្រូហិរញ្ញវត្ថុ និងហាងបញ្ចាំ
25-June-2016 | ដោយ មែន កំសត់
ភ្នំពេញ ៖ មន្ត្រីជាន់ខ្ពស់អគ្គនាយកដ្ឋានអត្តសញ្ញាណកម្ម នៃក្រសួងមហាផ្ទៃ បានស្នើឱ្យបណ្ដាប៉ុស្តិ៍នគរបាលរដ្ឋបាលទាំងអស់ ត្រូវបង្កើនការចាត់វិធានការចុះប្រមូលយកអត្តសញ្ញាណប័ណ្ណសញ្ជាតិខ្មែរ គំរូថ្មីពីតាមបណ្ដាធនាគារ គ្រឹះស្ថានមីក្រូហិរញ្ញវត្ថុ កន្លែងបញ្ចាំនានាទៀត យកមកជូនប្រជាពលរដ្ឋវិញ ខណៈមកដល់ពេលនេះ នៅតែមានគ្រឹះស្ថានមីក្រូហិរញ្ញវត្ថុនិងហាងបញ្ចាំមួយចំនួន បានព្រមព្រៀង និងមិនទាន់បញ្ឈប់គោលការណ៍របស់ខ្លួនយកអត្តសញ្ញាប័ណ្ណនោះទៅធ្វើ ជាឯកសារបញ្ចាំ សម្រាប់ផ្ដល់ប្រាក់កម្ចីការប្រាក់ជូនទៅប្រជាពលរដ្ឋ។ នេះបើតាមសារព័ត៌មានបាយ័ន។
លោកនាយឧត្តមសេនីយ៍ ម៉ៅ ច័ន្ទតារា អគ្គនាយក អគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ ថ្លែងឲ្យដឹងនៅថ្ងៃទៅ២៤ ខែមិថុនានេះថា អត្តសញ្ញាណប័ណ្ណគ្រាន់តែឯកសារបញ្ជាក់ពីអត្តសញ្ញាណពិតរបស់ ប្រជាពលរដ្ឋ វាមិនមានតម្លៃដូចប្លង់ដី ប្លង់ផ្ទះនោះទេ ហើយបណ្ដាធនាគារ និងគ្រឹះស្ថានមីក្រូហិរញ្ញវត្ថុ មិនគួរយកអត្តសញ្ញាណប័ណ្ណពីប្រជាពលរដ្ឋទៅតម្កល់បញ្ចាំនោះទេ ពោលគឺបើចាំបាច់ណាស់ត្រូវយកអត្តសញ្ញាណប័ណ្ណកូពីវិញទៅ។
លោកបានបន្ដថា កន្លងមកពិតជាមានប្រជាពលរដ្ឋយកអត្តសញ្ញាណប័ណ្ណខ្លួន ទៅតម្កល់ជាប់បញ្ចាំនៅនៅកន្លែងខ្ចីប្រាក់ហើយបានមកកុហកសមត្ថកិច្ច ថា បាត់សុំមកធ្វើថ្មីមួយទៀត ដែលធ្វើឲ្យមានការរាំងស្ទះដល់ដំណើរការធ្វើអត្តសញ្ញាណប័ណ្ណជូន ប្រជាពលរដ្ឋផ្សេងៗទៀត។
លោកម៉ៅ ច័ន្ទតារា បានបញ្ជាក់ថា សម្រាប់ការធ្វើអត្តសញ្ញាណប័ណ្ណ ដែលមានបុគ្គលម្នាក់ មុខមាត់ដដែលមកធ្វើពីរ ទៅបីដង ហើយខ្លះក្លែងបន្លំឯកសារសំបុត្រកំណើត ទីកន្លែងកំណើត ឬយកក្រយៅដៃខុសមិនត្រឹមត្រូវ ម៉ាស៊ីនដែលដើរដោយប្រព័ន្ធបច្ចេកវិទ្យាទំនើបនោះ វាមិនអាចព្រីនឬបោះពុម្ពចេញនោះទេ។
គួររំលឹកថាកន្លងមក ធនាគារជាតិនៃកម្ពុជាក៏បានចេញសេចក្ដីណែនាំពីបញ្ហាហាមប្រាមមិនឲ្យ បណ្ដាធនាគារនិងគ្រឹះស្ថានមីក្រូហិរញ្ញវត្ថុយកអត្តសញ្ញាណប័ណ្ណគំរូ ថ្មីធ្វើជាឯកសារតម្កល់បញ្ចាំកម្ចីប្រាក់នោះទេប៉ុន្តែមកដល់ពេល នៅតែមានកន្លែងផ្ដល់ប្រាក់កម្ចីមួយចំនួននៅតែមិនទាន់បញ្ឈប់ សកម្មភាពនេះ៕
ចំនួនអ្នកទស្សនា
- ថ្ងៃនេះ2921
- ម្សិលមិញ4911
- សប្តាហ៍នេះ20491
- ខែនេះ2921
- ឆ្នាំនេះ246161
- សរុប20688617